UK-a Labour Party-in hruaitu hlui lalut leh

United Kingdom-a eptu pawl lian ber Labour Party hruaitu hlui Jeremy Corbyn chu hun eng emaw chen an party aṭanga hnawh­chhuah a nih hnuah, Thawh­lehni khan lakluh leh a ni.

Thawlehni khan Labour Party-a thubuai ngaihtuahtu panel, National Executive Committee chuan Jeremy Corbyn chungchang hi an ngaihtuah a, committee thuchhuah angin lakluh a ni leh ta a ni. Lakluh a nih chungchangah hian Jeremy chuan a party member pui zawng zawngte chungah lawmthu a sawi a, trade union leh inpumkhat duhtu zawng zawngte chungah pawh lawm thu a sawi bawk. 

Lakluh a nih leh tak avang hian Jeremy chuan rorelna fung chelhtu Conservative sorkarin ram an hruai dik lohna zawng zawng chu dodal a nih tur thu a sawi a, hemi atan hian hmalak zel chu an party thil tumte zinga mi a nih thu pawh a sawi bawk a ni.

Equality and Human Rights Commission (EHRC) chuan October thla khan Jeremy hian mipuite chu anti-semitism (Juda ho huatna) kawngah a zirtir tih finfiahna an nei a, hetianga huatna inzirtir hian mimal nun a tichhe thei tiin EHRC chuan a tarlang. Hei vang hian Labour Party chuan an party aṭang hian Jeremy hi October thla vek khan an hnawtchhuak a ni. 

Jeremy hi lakluh a nih hi Jewish Labour Movement chuan an sawisel a, thuchhuah an siam zui bawk. Lakluh a nih an pawm theih loh chhan pakhat tarlangin, "Juda-te lakah ngaihdam dilna engmah a nei lo a, lakluh leh a ni hi Juda mite tana nat belhna ni a ni," tiin he movement hruaitu Keir Starmer chuan a sawi.