Israel sipaite beihpui thlaknaah Syria sipai pathum an thi

Israel sipaite chuan an ram hmarlam Syria rama an inrinaah improvised explosive devices (IEDs) kam hmuh a nih avangin fighter jet hmangin Thawhlehni zan khan Syria rama Iranian Quds force leh Syrian Armed Forces hmun a bei a, sipai pathum an thi. 

Beihpui an thlak hnua thu­chhuah an siamah, Israel sipai chuan an hmun beih chu ral­thuam dahna, military head­quarters leh compound bakah, Syrian surface-to-air missile battery-te a nih thu a sawi. 

Kum 2011-a civil war a chhuah hnu khan Israel hian thlawhtheihna leh missile hmangin Syria hi ṭum tam tak an lo bei tawh a, Iran sipaite leh Lebanese Hezbollah te bakah sorkar sipaite pawh a bei tel a ni. Hemi rual hian beihpui an thlak ṭhin hi Israel ram chhung an rawn beih hmasak avanga an chhan letna tih an sawi a ni. 

Thawhlehni khan Israel-in a luah, Golan Heights huam chhungah IED kam hi sipaite an hmu a, he thil hi Syria ram chhungah Iran a inkulh ngei tih finfiahna niin an sawi a ni. Hemi ni vek hian Israel defence minister Benny Gantz chuan hmarlama an ramri hi tlawh nghalin, Israel chuan Golan ram chhunga bomb kam hi a ngaihthah mai dawn lo tih a sawi. 

Syria sorkar chu a ram chhung aṭanga Israel beihna thlengah mawhphurtuah an puh tih Israel sipai chuan sawiin, Syria rama Iran sipaite inkhuar chu a lu aṭangin an bei chhunzawm zel dawn tih an sawi a ni. 

Iran hi Syria president Bashar al-Assad leh a kaih­hruai sorkar thlawptu a ni a, Syria tualchung indona thlengah pawh sorkar sipaite pui turin Iran sipai eng emaw zat thawn luh an ni. Hetih lai hian President Assad chuan amah pui turin Iran sipaite an lut tih erawh a la sawilang ngai lo thung.