Pakistan jail aṭangin Asia Bibi chhuah

Pakistan Kristian hmeichhia, Islam zawlnei Muhammad-a sawichhiaa puh vanga thi tura a chungthu relsak tawh Asia Bibi-i chu court-in thiam a chantir leh tak avangin Nilaini zan kha jail aṭanga chhuahtir a ni ta tih a lawyer chuan a sawi.

Asia Bibi-i kum riat zet jail-ah tantir a ni tawh a, mahse ah hremna hi ngaihtuah ṭha tura a ngen hnuah kar hmasa khan Pakistan Court chuan thiam a chantir a ni. Court thutlukna hian Islamist-te a thinur hle a, Bibi-i hi tihhlum ngei phutin ramchhung hmun hrang hrangah nawrh an huaihawt a ni. Pakistan sorkar pawhin chhuah zalen a nih hnuah pawh Bibi-i hi Pakistan ram chhuahsan a khapsak dawn tih a sawi bawk.

Media report chuan Bibi-i hi tanna, Multan jailaṭanga chhuah a nih hnuah Noor Khan Airbase, Rawalpindi panpui a ni a, heta

ṭang hian Netherlands lamah hruai a ni dawn niin an tarlang. Bibi-i pasal hian a hmain an nunna atan a hlauhawm nia sawiin, US, UK leh Canada ram hruaitute hnenah Pakistan a chhuahsan theih na atana pui turin a ngen. Italy chuan Asia Bibi ṭanpui dan hi a ngaihtuah dawn tih a sawi.

Tehreek-i-Labaik Pakistan (TLP) thupuangtu Hafiz Shahbaz Attari chuan Netherlands ambassador leh sokar official-ten Multan jail an tlawh hnuah Asia Bibi hi chhuah a nih thu leh, Netherlands panpui tum a nih thu a sawi. Party worker-te chu Bibi-in Pakistan a chhuahsan tur dang tura sorkar nawrin Islamabad leh Rawalpindi-ah an pungkhawm tih a sawi bawk. Bibi hi rampawn lama a kalchhuah phalsak a nih chuan TLP leh Islamist party dangte chuan nasa zawka nawrh huaihawt an tum a ni.

Islam hi Pakistan national religion a ni a, Islam sakhua sawichhia leh tibawrhbangte hremna na tak siam a ni a, hei hi mipui pawhin an thlawp hle. Pakistan-ah hian Kristian chu 1.6% vel chauh an awm a, Kristiante hian beih an tawk fo a ni.