South Korea-in 1980-a thil thleng vangin ngaihdam dil

South Korea chuan kum 1980-a Gwangju-a nawrh huaihawtte chunga sipaite chetdan chungchangah ngaihdam a dil.

Kum 1980-a Gwangju khuaa sorkar laka lungawi lohna lantir a nih ṭuma sipai tirh luhte chuan nawrh huaihawt zinga hmeichhe eng emaw zat an pawngsual a ni. Hemi ṭuma thil thleng chungchang sorkarin a chhuichiannaa, pawngsual tawk hi mi 17 awmin an zinga hian tleirawl te te leh naupai laite pawh an tel a ni.

Defence Minister Jeong Kyeong-doo chuan sipaite chetdan chuan hmeichhe pawisawilote chungah natna a thlen dan chu ṭawngkama sawifiah theih a ni lo tiin, he thil thleng vang hian ngaihdam a dil tih a sawi.

Hetihlai hian sipai kut tuartute chuan ngaihdam dil ringawt hi a tawk lo niin an sawi. Pawngsual tawktu zinga mi, Kim Sun-ok chuan thilsual titu sipaite hi hrem an nih loh chuan ngaihdam vawi sang tel pawh dil se awmzia a awm lo a ni, a ti.

South Korea-ah hian kum 1979 khan General Chun Doo-hwan kaihhruaiin sipai chakna hmangin sorkar paihthlak a ni a, martial law puan nghal a ni. Hei hi duh loin chhim thlang lama khawpui, Gwangju-ah lungawi lohna lantir a ni. Hei vang hian sipai ṭhahnem tak tirh luh an ni a, sipaite chuan Provincial Government Office-a pungkhawmte chu kapin, mi 200 chuang thi leh chin hriat lohin an awm a ni. Sipaite hian mipui pungkhawmte hi kut an thlak nasat bakah hmeichhiate an pawngsual bawk nia sawi ni mah se, hemi chungchang hi sawilan a ni lo. 

Mahse kum 2017-a liberal President Moon Jae-in an thuneihna a chan hnu khan Gwangju-a thil thleng hi chhui ṭha turin a ti leh a ni. Hemi hnua sorkarin a chhui chian hnuah, hmeichhe 17 chuan pawngsual an tawk ngei tih a finfiah tawh a ni.