Trump-an Attorney General Jeff Sessions a ban

US President Donald Trump chuan US Attorney General Jeff Sessions chu Nilaini khan a ban.

President Trump chuan top law enforcement official, Jeff Sessions hi Russia investigation kalpui chungchangah a inhnamhnawih duh loh avangin a lo sawisel fo tawh a ni. Ban a nih thu a sawi hnuah Sessions thlak lailawktu atan hian Russia inquiry sawisel fotu, chief of staff Matthew Whitaker ruat a nih thu a sawi bawk. President chuan Jeff Sessions chu an ram tana a hnathawkte avanga lawmthu hrilhin, duhsakna a hlan bawk.

Hetihlai hian Alabama senator hlui, Jeff Sessions chuan Trump-a hnena banna lehkha a thehluhah, ama duhthua banna thehlut a ni lo tih a ziaklang a, president-in a ngen angin a bang tih a sawi. Republican president chu lawmthu hrilhin, attorney general dinhmun a chelh chhungin dan leh thupekte chawinun a nih thu a sawi.

Democratic party Senate leader Chuck Schumer chuan president chuan thil thup tum eng emaw a nei niin a puh a, Robert Mueller-an thil a chhui mekah fund tihtawp leh khuahkhirhna siam te alo rawt tawh avangin Whitakter pawh chu acting attorney general a nih chhung pawha inhnamhnawih duh lo turin a ti.

Special Counsel Robert Mueller chuan Trump president campaign leh Russia thawkduna puh an nihnaa a finfiahna a zawng mek a ni. Department of Justice vilna hnuaia he thil chhuinaah hian Trump-a thawhpui eng emaw zat chu criminal case siamsak an ni tawh a ni. Democrats lamin Senate confirmation hearing laiin Sessions hian Russian ambassador nena an inbiakna a sawilang lo nia an puh hnuah Session hi he thil chhui mekah hian a inhnamhnawih duh tawh lo a ni. A hnuah meeting a neihpui hi a lo theihnghilh thu leh, Trump election campaign laia thleng a nih thu a sawi a ni. Trump hian Sessions hi mi chak lo leh ngeiawm tiin a lo sawi fo tawh a ni.