Ukraine mipuite tlanchhuahna tur kawng hawnsak leh

Russia chuan nimin khan Ukraine khawpui a beih meka civil mite tlanchhuahna tur kawng a hawnsak tih a puang.

Ukraine khawpui, Kyiv leh khawchhak lam khawpui Kharkiv leh Sumy bakah Mariupol-ahte nimina Russia ram hun, chawhma dar 10 aṭangin mipuite chhuahna hun hi hawnsak a ni tih Russia defence ministry chuan a sawi.

Kyiv khawpui aṭanga chhuah turte hian Belarus an pan a ngai dawn a, Kharkiv aṭang chuan Russia ramah an luh a ngai dawn thung. Russia hian thlawhtheihna hmangin Kyiv aṭang hian Ukraine mite chu Russia ramah a phur thei bawk tih ministry chuan a sawi bawk. Mipuite tlanchhuahna tur kawng an ruahman hi Ukraine hnenah pawh kimchang taka information pek lawk a nih thu a sawi a ni.

Hetih lai hian Ukraine chuan Russia chetdan chu thil tihawm lo tak niin a sawi a, Ukraine president Volodymyr Zelenskyy thupuangtu chuan Russia hian mipuite tawrhna chu TV lama lan mawi tumna atana hmangah a puh. "Ukraine ram mi leh sa an ni a, Ukraine ram chhung hmun dangah an tlanchhiat hi phalsak an ni tur a ni," a ti. Khawvel mithmuhah indona hmun aṭanga Ukraine civil mite tlanchhuahna tur kawng hawnsaka inlan tir chung siin, an thununna hnuaia an luh turin Belarus leh Russia rama an tlanchhuah theihna tur kawng chauh a siam a ni, a ti.