Russia-a indo duh lohna lantir mi ṭhahnem tak man

Ukraine-a indona thleng mek duh loa lungawi lohna lantir, Russia mi 4,300 chuangte chu Pathianni khan man an nih thu rights group leh Russia thuneitute chuan an sawi. Heng zinga mi 1,700 velte chu Moscow khawpuia mi te an ni.

OVD-Info rights group chuan Pathiannia mante hi Russia ramchhunga khawpui 53 aṭanga man khawmte an nih thu a sawi.

Russia ramah hian nawrh huaihawt hi khap ni mah se, Russia-in Ukraine a run hnu hian mipuite'n indo duh lantira kawng zawh an nei fo a ni. Ni 11 liamta chhung khan mipui 10,000 chuang chu man an nih tawh thu OVD-Info chuan a sawi a, Siberia khawpui lamah te pawh nawrh hi huaihawt a ni.

Russia sorkar dodaltu lian tak, jail-a tang mek Alexei Navalny chuan kar liam ta khan mipuite chu indo duh lohna lantira ni tin nawrh huaihawt turin a lo fuih a, Russia chu mi dawihzep awmkhawmna a ni tur a ni lo, a ti. Hetih lai hian sorkarin dan thar a siam belh zel avangin nawrh huaihawt hi a khirh chho zel niin rights group-te chuan an sawi.

Amnesty International chuan Russia dan siamah hian 'phalna' leh 'khap' tih chungchang hi ngialnganin ziak lang lo mah se, punkhawmna buatsaih dawn chuan thuneitute phalna lak zel phawt a ngai a ni, a ti.

Indo duh lohna hi Russia ramah chauh lantir a ni lo a, Pathianni khan khawvel ram dangah pawh rally huaihawt a ni. Russia ram ṭhianṭha, Kazakhstan-a Almaty-ah mi 2,000 velin peace rally an nei a, Brussel leh London-ah pawh kawngzawh huaihawt a ni bawk. Ukraine chhim lama Nova-Kakhovka khuaah pawh mipuiten kawng zawhin, Russia sipaite chu an ram lama kir tura tiin an au a ni.