Philippines court-in first lady hlui manna thupek tichhuak

Philippines anti-corruption court chuan an ram first lady hlui, Imelda Marcos-i chu eiruk thubuai pasarihah thiam loh chantir a nih vangin nimin khan manna tur thupek a tichhuak.

Imelda Marcoso-i hi a pasal, dictactor hlui Fernidaand Marcos-an kum sawmhnih zet ro a rel chhungin eirukna hrang hrangah inhnamhnawiha puh a ni. Kum 1986 khan a pasal hi sipai thlawpna hmangin paihthlak a ni. Marcos-i hi pheikhawk, tlereuh leh lemziak man to tak tak a ngah em avangin sawizui pawh a hlawh hle a ni.

Kum 89 mi, Marcos-i hi eiruk thubuai pasarihah hian kum 6-11 jail tang tur hrem ṭheuh a ni. Manila governor a nih laiin Swiss foundation-a bank transfer ṭum sarih siamin, dollar maktaduai 200 a dah lut nia puh a ni bawk.

Nimina court-a a chungthu ngaihtuah lai hian Marcos-i leh a aiawhte an inlan lo a, court thupek tihchhuah hnuah pawh biak theih a ni lo a, a ukil-te pawhin media-te zawhna an chhang duh lo.

Manna tur thupek hi Marcos-i hian Sandiganbayan court-ah a la appeal theih avangin man nghal a la ni mai dawn lo niin prosecutor chuan a sawi. Assistant special prosecutor Ryan Quilala chuan Sandiganbayan court thutlukna siamah pawh a la lungawi lo a nih chuan Supreme Court-ah a la zualko leh thei tih sawiin, a tawpna a la ni mai lo tih a sawi.

Congress member term thum ni tawh, Imelda Marcos-i hian Ilocos Norte governor thlanna turah chuh turin a hming pawh a lo thehlut tawh a ni. Ilocos Norte governor nilai hi a fanu, kum 62 mi Imee Marcos a ni. He bialah hian Marcos chhungkua hian thlawptu an la ngah hle a ni.

Ferdinand Marcos khan kum 20 chhung Philippines-ah hian ro relin, kum 1972-ah martial law hnuaiah a dah a, hemi chhung hian amah eptu lam mi tam tak chu thah leh man bakah chin hriat loha bo zui an awm a ni. Thuneihna a chan lai hian sorkar sum dollar tluklehdingawn 10 zet tichingpena puh a ni a, paihthlak a nih hnuah ram pawnah tlanchhiain kum 1989 khan a thi a ni.