China-in Pakistan hnenah ṭanpuina a pek zat puanzar a khap

China chuan Pakistan Prime Minister Imran Khan-an an ram a tlawh ṭuma Pakistan ṭanpuina tur sum a pek zat tur a sawi chu puangzar lo turin a ti.

PM Imran Khan hian amah ngeiin China sorkar hian sum zat hi sawi lang lo tura an ngen thu a sawi a, hei hi an thawhpui dangte an ngaihmawh an hlauh vang nia sawi a ni. Imran Khan chuan China ram a han tlawh hi a hlawhtling hle tih a sawi tawh a, a beisei phak baka a hlawhtlin thu leh, China chuan an theih ang anga Pakistan puih an lo intiam thute a sawi.

Hetihlai hian media report ṭhenkhat chuan China hian Pakistan tan ṭanpuina dollar makta-duai 6 pek a tiam niin an tarlang. Leiba ngah avanga sum lama harsatna tawk mek, Pakistan hian Saudi Arabia hnen

aṭangin ṭanpuina dollar maktaduai 6 a lo dawng tawh bawk a ni. Mahse official-te chuan Saudi leh China aṭangin ṭanpuina dawng mah se, an leiba laka khaichhuah an nih theihna turin International Monetary Fund (IMF) an la pan a ngai dawn tho niin an sawi.