Venezuela aṭanga pemchhuak mi mtd 3 tling tawh

United Nations chuan kum 2015 aṭang khan Venezuela ram politics buaina leh ei leh bar lama harsatna an tawh avangin mi maktaduai thum zet chu ramdangah an pemchhuak tawh tih a sawi.

U.N. High Commissioner for Refugees (UNHCR) hotu William Spindler chuan thla ruk kalta chhung khan Venezuela ram aṭanga tlanchhia hi an pung nasa hle tih a sawi a, heng zinga a tam zawk hi Colombia leh Peru-ah te an lut a ni, a ti.

Colombia ramah hian Venezuela mi maktaduai khat vel an awm tawh a, nikhatah mi 3,000 te an lut ṭhin a ni. Colombia sorkar chuan kum 2021-ah chuan mi maktaduai li vel an tling thei dawn nia sawiin, heng mite enkawlna senso atan hian dollar tluklehdingawn 9 dawn a ngai dawn niin a sawi.

Venezuela President Nicolas Maduro-a hnuaiah oil ngah ram, Venezuela hian sum lamah harsatna a tawk nasa hle a, politics lama eptute hrek beh niin, ei leh bar lamah pawh mipuiten harsatna an tawk nasa hle. Mahse President chuan an ram dinhmun ṭha lo tlanchhiat sanin mi tam tak an pemchhuak nia sawi chu thu dik lo niin a sawi thung a, an ram inrelbawlnaah ramdangte inrawlh tumah a puh bawk.