Sri Lanka President-in Parliament ṭhiat Nakkum Jan 5-ah inthlang dawn

Sri Lanka President Maithripala Sirisena chuan an ram chhung politics buainain ziaawm lam a pan theih loh avangin kar kalta Inrinni khan an ram Parliament a ṭhiat a, nakkum January 5 ah inthlanpui neih a ni dawn tih a sawi nghal bawk.

President Sirisena-an an ram prime minister aṭanga Ranil Wickremesnghe ban a, a aiah president hlui Mahinda Rajapaksa a ruat avangin politics buaina a awm zui ta a ni. Wickremesinghe hian dan ang takin an ram prime minister a la ni reng a, House-ah majority pawh a la nei tih sawiin hemi finfiah tur hian floor test neih a phut a, mahse a ngenna hi hnawlsak a ni.

Parliament Speaker Karu Jayasuriya pawhin President thiltih dan chu ram danpui kalh leh democracy palzutna a ni tih sawiin, floor test-ah hnehna a chan hma chuan Rajapaksa chu prime minister atana a pawm theih loh thu a sawi. Speaker chuan November 14-a floor neih a duh a, mahse hemi a thlen hma hian President chuan member 225 awmna Parliament hi a ṭhiat ta a ni. Parliament term kal lai mek hi kum 2020 August thlaa tawp tur a ni.

President chuan nakkum January 5-ah inthlanpui neih a ni ang a, hemi atana nomination thehluh hun chu November 19-26 chhung hawn a ni dawn tih a sawi.

Hetihlai hian PM aṭanga ban, Wickeremesinghe chuan President-in Parliament a ṭhiat chu an party, United National Party (UNP) chuan Supreme Court-ah a khing dawn tih a sawi a, President thiltih dan chu dan kalh a ni, a ti.