Jamal Khashoggi case : Turkey-in Saudi leh US te tape pe

Turkey chuan October 2-a Istanbul-a Saudi consulate-a thah, Saudi journalist Jamal Khashoggi thah a nih dan nena inkaihhnawih audio recording a neih chu US, UK, Saudi Arabia leh ram dangte a pe tih a sawi.

Turkey President Recep Tayyip Erdogan chuan Saudi Arabia chuan Khashoggi thattu chu a hriat ngei a rin thu a sawi nawn leh.

Saudi roreltu leh lal chhungkua sawisel ṭhintu, journalist Khashoggi hi October 2 khan Istanbul consulate-ah a nupui neihna tura lehkha pawimawh la tura a kal chu consulate chhungah hian thah a ni. Saudi Arabia sorkar pawhin thah a nih ngei thu hi sawichiang tawh mah se, he thilah hian lal chhungkuaten inhnamhnawihna an nei lo niin a sawi.

Khashoggi tihhlum a nih dan chiah hi hriatchian a ni lo. Turkey media-te chuan thah a nih hmain nghaisak hmasak phawt a ni tih finfiahna audio recording a awm niin an sawi. Mahse kar hmasa khan Turkey chuan consultate a a luh veleh Khashoggi hi rehhlum a ni nghal tih sawiin, an hmaa ruahmana lo awm tawh angin a ruang pawh chandarh vek a ni tih a sawi. Tun thlengin Khashoggi ruang hi hmuh a la ni lo.

Saudi Arabia chuan a tira a ṭanna, Khashoggi hi nungdamin consulate aṭangin a chhuak ngei tih chu thlakin, consulate chhungah thah a ni tih a sawichiang tawh. He thila inhnamhnawiha rinhlelh mi 18 pawh man a ni tawh a, heng mite chungthu hi Saudi Arabia-ah ngaihtuah a ni ang. Hetihlai hian Turkey chuan heng mite hi an rama an chungthu ngaihtuah tura thawn turin a ngen.