Indonesia-in thlawhtheihna chesuala chuangte zawn hna titawp

Indonesia thuneitute chuan October 29-a tuipuia tla, Lion Air thlawhtheihnaa chuangte ruang zawn hna chu kar kalta Inrinni khan an titawp tih an sawi. Thlawhtheihna black box, cockpit voice recorder erawh zawn chhunzawm zel an tum.

National search and recue agency (Basarnas) hotu Muhammad Syaugi chuan thlawhtheihna tlakna bial chu an dap chhuak tawh tih sawiin, ruang hmuh belh a awm tawh lo tih a sawi. Hei vang hian ruang zawn hna chu an titawp dawn tih a sawi a ni.

October 29 khan Boeing Co.737 MAX, mi 189 chuanna chu Jakarta aṭanga a thlawhchhuah hnu reiloteah tuipuiah a tla a ni. Thlawhtheihna tla leh a chuangte ruang zawn hna hi thawh nghal niin, Syaugi chuan taksa peng hrang hrang an hmuhte enfiah a nih hnuin, forensic examination aṭangin 77 chu finfiah an ni tawh tih a sawi.

Thlawhtheihna black box pakhat zawk, flight data recorder pawh hmuh a ni tawh a, data download mek a ni. Mahse cockpit voice recorder zawk erawh hmuh a la ni lo thung.