California ram kang vanga thi mi 25 tling tawh

US-a California state-a ram ngaw kang vanga thi chu Pathianni thleng khan mi 25 an tling tawh tih official-ten an sawi.

State hmarlama Paradise khaw bulah ruang 14 hmuh belh niin, chhim lama Malibu bulah ruang pahnih hmuh belh leh an ni. State chhung hmun pathuma ram kang vang hian mi 250,000 vel chu hmun him lamah an tlanchhe tawh bawk.

US President Donald Trump chuan kangmei chhuahna chhan pakhat chu ram ngaw enkawl ṭhat loh vang niin a sawi.

Kar kalta Ningani khan ram kang, Camp Fire hi Butte County-ah darhin, Paradise khua a kangkai a, kang ṭhelhtute pawhin an dang zo lo a ni. Camp Fire hian ram acre 100,000 vela zau a kang tawh a, kangmei chhuak hi 20% vel chauh thunun theih a la ni a, Fire hotute chuan

ṭhelh mit vek tur chuan kar thum vel hun a la ngai dawn niin an sawi. Zirtawpni khan chhim lam, Malibul bulah ram a kang bawk a, he ramkang, Woolsey hian a kangkai chak hle a, acre 70,000 a zau a tuam tawh a ni. Ram kang vang hian kar kalta Nilaini-a silai kengin mi 12 a kahhlumna, Thousand Oaks khuaa chengte pawh hmun him lama insawnchhuak tura hriattir an ni.