Sri Lanka President-in parliament a ṭhiah chhan sawifiah
Sri Lanka President Maithripala Sirisena chuan kar kalta Zirtawpnia an ram Parliament ṭhiat a, nakkum January thlaa inthlan ṭhat buatsaih tura thutlukna a siamna chhan chu an ram buaina punlun zel tur venna atana ti a nih thu a sawi.
President chuan party hrang hrang inkara buaina chhuak tur venna atan Parliament chu a ṭhiat tih a sawi a, hemi rual hian President thuneihna zahsak lohah Parliament Speaker Karu Jayasuriya chu a puh bawk. Parliament term tawp nan hian kum hnih dawn a la awm a, mahse tualchhung politics a buai chhoh tak vangin President chuan a ṭhiat a ni.
Prime minister a nihna aṭanga ban tak, Ranil Wickremesinghe chuan President thiltih hi na takin a sawisel a, political party leh civil society group-te pawhin ram danpui kalh niin an sawi bawk. President chuan prime minister aṭanga a ban tak, Wickeremsinghe leh a aiawh tura a ruat, Mahinda Rajapasak-te chuan PM dinhmun hi an inchuh avangin Parliament-a vote lak hunah politician te an intihbuai a hlauhthawnawm hle tih media report pawhin an tarlang a ni, a ti.
Sirisena chuan an party in PM atana Rajapaksa thlang tling turin Parliament-ah member an ngah tawk lo nia an sawi hnu lawkah member 225 awmna Parliament hi a ṭhiat a, nakkum January 5-ah inthlanpui neih ṭhat tur thu a puang nghal a ni. President chuan a hmaa ruahman lawk anga November 14-a Parliament inkhawm koh a nih chuan House-ah tharum thawhna a thlen mai a hlauhawm niin a sawi a, hei hi ramchhungah a punlun zel a hlauhawm thu a sawi a ni.
Parliament member ṭhenkhatin an ṭan lam thlak turin suma thlem an nih thu an sawi chu chhangin, Sirisena chuan cheng nuai 100 - 150 inkar vela MP te lei theiha an awm chu pawi a tih thu a sawi. Politics buaina tawh mekah a mawhphurtuah Speaker Jayasuriya chu a puh bawk.
US, UK leh Canada chuan Sri Lanka President-in Parliament a ṭhiat chu an dem thu sawiin, democracy kalphung a ni lo tih an sawi. Parliament ṭhiah ringawt chuan Sri Lanka politics buaina a tihbelhchhah an hlauh zawk thu an sawi.