Gaza-a inbeihnaah Hamas commander thi

Israel sipaiten Gaza Strip-a beihpui an thlaknaah Palestinian paruk an thi a, an zingah hian Hamas commander a tel.

Israel sipaite chuan Hamas chhim lam, Khan Younis khawchhak lama Hamas ho nena an inkahnaah an sipai pakhat a thih bakah midang pakhatin hliam a tuar bawk tih an sawi.

Gaza Strip aṭanga Israel chhim lama rocket kah eng emaw zat chu Israel sipaite hian an lo kap thla a, rocket-warning siren pawh tihrik a ni.

Israel Prime Minister Benjamin Netanyahu chuan Khan Younis-a inbeihna thleng vang hian Paris-a Indopui-I-na tawpna hriatrengna hun hmang tura a zin pawh pawttawiin, Pathianni khan an ramah a kir leh nghal a ni.

Hamas thupuangtu chuan Israel sipaite thiltih dan chu dawihzepthlak tiin a sawi a, sipaite kut tuara thi hi Izzedine al-Qassam brigades commander Sheikh Nur Barakeh a nih thu a sawi. Hamas chuan Israel special force-te chuan Gaza Strip-ah car chhung aṭangin silai hi an hmetpuak tih an sawi a, hemi hnu hian Hamas ho nen hian an inkap zui a ni.

Gaza Strip aṭang hian rocket hmangin Israel chhim lam hi beih a ni fo a, hei hi Israel sipaite chuan na takin an chhanglet nghal zel a ni. Kumin March thla aṭanga Palestinian-ten Gaza leh Israel ramri-a lungawi lohna an lantir aṭang khan Israel sipaite silai hmehpuahah Palestinian mi 200 chuang an thi tawh bawk.