US-a pem tumten Mexico city thleng
Central America aṭanga US-a pem tuma a ruala kalte chuan Mexico city an thleng tawh a, heta ṭang hian US ramri lam an pan leh mek.
Mexico official-te chuan kar kalta Zirtawpni leh Inrinni khan US-a pem tum, mi 6,531 te hian an Queretaro state an thleng tih sawiin, an zinga 5,771 chuan Pathianni zing khan ramri lam an pan tih an sawi. Tualchhung mite hian US pan tumte hi ei turte pawh an lo pe a ni.
US President Donald Trump chuan dan loa an rama luh tumte hi lo dan an tum tih sawiin, an rawn kalna ram thuneitute hnenah pawh hruai kir leh turin a lo ti tawh a ni. Mahse pem tumte hi Mexico ramri aṭanga US luh tumin an kal lui tho a, hei vang hian Trump chuan ramri-a duty turin sipai 5,000 chuang a lo tir tawh bawk.
US pana a ruala kal zinga a tam zawk hi Honduras, Guatemala, El Salvador leh Nicaragua aṭang kal an ni a, kawng lakah kar tam tak an thang tawh a ni. An zinga tam tak chuan an rama retheihna, tharum thawhna thleng reng leh politics buainate tlanchhiat san an nih thu an sawi.
Mexico chuan pem tumte hi an awmna tur pek a lo remtih bakah, work visa pawh pek alo tiam a, mi 2,697 chu temporary visa pawh a pe tawh a ni. Mahse an zinga a tam zawk chuan US pan an duh zawk a ni.