Ukraine leh Russia foreign minister-te Turkey-ah inhmu dawn

Russia foreign minister Sergey Lavrov leh Ukraine foreign minister Dmytro Kuleba-te chuan naktuka Turkey chhim lama diplomatic forum neih kar lakah inbiak an remti tih an sawi.

Turkey foreign minister Mevlut Cavusoglu chuan ram pahnih foreign minister-ten Antalya-a inhmuh an remtih thu hi nimin khan a twitter-ah tarlangin, February 24-a Russia sipaiten Ukraine ram an run hnua ram pahnih top official-ten inbiakna an neihna hmasa ber tur a nih thu a sawi. Inbiakna neih an remti chu lawmawm a tih thu leh boruak ṭha a thlen ngei a beisei thu a sawi bawk.

Cavusoglu chuan Turkey president Tayyip Erdogan chuan Pathianni khan Russia president Vladimir Putin biain, international diplomatic forum neih ruala Ukraine leh Russia official-te inbiakna lo huaihawt an inhuam thu hi a hrilh a, hei hi Russia lam hian a rawn remti ta niin a tarlang.

Thawhṭanni khan Russia leh Ukraine ram aiawhte hi indona a thlen hnua a ṭum thumna atan an inbe leh a, mahse inremna mumal an siam leh thei lo. Inbiakna neih leh erawh an remti a ni.