Russia-in Ukraine mite chhuah dan tur ruahmanna thar siam

Russia chuan Ukraine khawpui pali, Kyiv, Chernihiv, Sumy leh Mariupol aṭanga civil mite insasengna tur ruahmana Thawhṭannia inkahhai a puan hnuah, nimin khan ruahmanna thar siamin inkahhai a puang nawn leh.

Thawhṭannia ruahmanna a siamah, Ukraine aṭanga tlanchhuah duh, civil mite tlanchhuahna tur kawng a ruahman chu Russia ram leh amah thlawptu, Belarus rama lut vek an ni. Hei hi Ukraine lam chuan sawiselin, civil mite chu a thununna huang chhungah vek hruai luh a tum niin Russia chu a puh a ni.

Hemi hnu, nimin zing khan Russia chuan civil mite tlanchhuahna tur ruahmanna dang hi siamin khawpui pali ah hian inkahhai hi a puang leh. He ruahmanna tharah hian heng khawpui aṭanga civil mi insaseng duhte chu Russia emaw, Belarus emaw an pan kher ngai loin, Ukraine ram chhunga khawpui dang an pan phalsak an ni ang.

Russia-in Ukraine a run hnuah, Ukraine mi maktaduai 1.7 chuang chu Central Europe-ah an raltlan tawh a ni.

UN refugee agency chuan Ukraine leh Russia-te chu civil mite himna ngai pawimawh turin a ngen a, indo an chhunzawm zel chuan raltlan hi an la pung zel dawn a, an dinhmun pawh a chhe chho zel dawn a ni, a ti. Hei vang hian Europe leh a bak ram dang mipuite pawhin an dinhmun hi an lo hriatthiampui hle a ngai dawn tih UNHCR hotu Filippo Grandi chuan a sawi.