Taliban thuneihna chan hnuah civil mi 400 dawn an thi tawh : UN

Afghanistan rama Taliban-te'n thuneihna an chan hnua inbeihna thlengah civil mi 400 dawn an thi tawh a, heng pawikhawihna thleng zinga 80% chuang chu ISIL (ISIS) nena inzawmna nei pawl tih a nih thu United Nations report chuan a tarlang.

Kum 2021, August thlaa United States thlawp sorkar paihthlaa Taliban-in thuneihna an hnehchhuh hnua Afghanistan-a human rights report mumal tak tihchhuah hmasa ber niin, khawthlang ramte zingah nasa zawka hmeichhia, journalist leh mipuite dikna rahbehsak an nih hlauhthawnna a lian hle.

He report hian August 2021 - February 2022 inkar huamin, civil mi thite zinga 397-te chu Khorasan Province-a Islamic State pawl, ISKP (ISIS-K) pawl pawikhawihna thlena thi an ni tih a tarlang. Hemi hun chhung vek hian armed group nena inzawmna neia rinhlelh mi 50 chuang thah an ni bawk a, an mi thahte hi nasa taka nghaisain ṭhenkhat chu an lu an tansak a, an ruang hi kawngsirahte an hnutchhiah tawp a ni.

UN Human Rights-a High Commissioner Michelle Bachelet chuan Thawhṭannia Geneva-a report a pekah, "Afghan-a mihringte zalenna chu nasa taka sawinghinin a awm mek a ni,"tiin a sawi a ni.

Kum 2014 tawp lam aṭanga Afghanistan-a rawn inlar, ISKP hi Taliban-in thuneihna an chan hnuah an huangtau sawt hle a, tunhnai khan pawikhawihna hrang hranga inhnamhnawihah puh an ni a, heng zingah hian nikum August thlaa Kabul airport beihnaa mawhphurtuah khan puh an ni bawk.

Bachelet chuan Afghanistan-a Taliban hruaitute'n hmeichhiate dikna leh zalenna an rahbeh sak chu sawiselin, hmeichhiate chu khawtlang thilah pawh zalen taka an tel phalsak turin a ngen. Activist leh Taliban sorkar sawiseltu eng emaw zat chu an chin hrait loin an awm thu sawi bawkin, Aghanistan rama freedom of expression chungchanga khuahkhirhna siam chu ngaihven a ngai hle a ni, a ti.

Taliban hian kum 1996 - 2001 inkara thuneihna an chan chhung khan hmeichhia-te khuahkhirhna nasa tak siamin, lehkha an zir pawh an phalsak lo a ni. Mahse nikuma thuneihna an chan thar leh khan he policy hi a thlak tawh a, sorkar huamzau zawk an siam dawn tiin an sawi a, hei hi a takin an kalpui dawn em tih erawh rinhlelhna a la tam hle a ni.