Amnesty-in Suu Kyi-i chawimawina hlihsak

Amnesty International chuan Myanmar ram hruaitu Aung San Suu Kyi-i hnenah chawimawina sang Ambassador of Conscience Award a lo hlan tawh chu a hlihsak.

Politician leh Noble Peace Prize pawh lo dawng tawh, Suu Kyi-i hi Myanmar sipai sorkarin house arrest-a a hren lai, kum 2009 khan he chawimawina hi hlan a lo ni tawh a ni.

Rights group chuan Myanmar-a Rakhine state-a Rohingya Muslim-te beih an nih chungchangah Suu Kyi-i hi an thlavanga hauh zawng leh, sipaite chetdan dem zawnga a ṭawngchhuah duh loh avangin a chungah an lawm lo hle tih an sawi. Myanmar sipaite beihna avang hian Rohingya mi nuai sarih chuang zet chu Bangladesh ramah an tlanchhia a ni.

Myanmar rama democracy tundin a nih theihna atana a beihna avanga fak hlawh tak leh chawimawina hrang hrang pawh lo dawng tawh, Suu Kyi-i hi sorkarna an chan hnua Rohingya mite chunga thil thleng chungchangah an thlavang a hauh sak loh vangin sawisel a tawk nasa hle a, chawimawina alo dawn tawh pawh eng emaw zat chu lakkir sak a ni tawh.

Amnesty Secretary General Kumi Naidoo chuan Suu Kyi-i hnena lehkha a thawnah, "Mipuite tana beiseina leh huaisenna aiawhtu i ni thei tawh lo leh, human rights i humhalh thei tawh lo hi a pawi kan ti takzet a ni" tiin a hrilh. Rohingya te chunga thil thleng a pha leh, civil mite beih an ni dan chuan Myanmar ram dinhmunin hma a sawn lo hle tih pawh a tilang niin a sawi bawk.

Rakhine state-a thil thleng chungchang chhuitu, United Nations investigator-te chuan Rakhine state-a thil thlengah hian Suu Kyi-i hi inrawlh kher lo mah se, mi tam tak thah leh pawngsual an nihna laka venghim turin a thuneihna a hmang ṭangkai lo niin a sawi. Rohingya muslim te beih an nih chungchang chhuitu Reuters journalist pahnih man anih chungchangah pawh Suu Kyi-i hian an thlavang a hauhsak lo a ni.