California ram kang vanga thi zat pung zel

US-a California state-a ram kang vanga thi chu mi 31 an tling tawh a, chin hriat lohin mi 200 chuang an awm mek bawk niin official-ten an sawi.

California ram kang hi kum 1993-a Los Angles-a Griffith Park-a chhiatna thlen hnua an state-a chhiatna thleng rapthlak ber a ni tawh a ni. Thawhṭanni khan state hmarlama ram kang, Camp Fire vangin mi paruk an thih belh a, chhim lama Woolsey Fire vangin mi pahnih an thi bawk. Woolsey Fire hian beach resort eng emaw zat a kangchhe tel tawh a ni.

State chhung hmun thuma ram kang nasa tak thleng vang hian mi 250,000 chu hmun him lamah an tlanchhe tawh bawk a ni.

Thli tleh vangin ram kang hi a darh chak hle a, California Governor Jerry Brown chuan President Donald Trump hnenah emergency fund tam zawk hmuh a nih theihna tura major disaster-a puang turin a ngen. Hemi hma hian President Trump chuan ram kan chhan pakhat chu ram ngaw enkawl ṭhat loh vang a ni tiin, California tana fund pek pawh tihtlemsakah a lo vau tawh a ni.

Kar kalta Ningani aṭanga kangmei chhuak hian Paradise khua leh a bul vel a kangchhe nasa hle a, Paradise mayor Jody Jones chuan mihring chenna hmun 90% vel zet chu a kangchhia niin a sawi.

Fire official-te chuan kangmei chhuak hian ram acre 111,000-a zau a kang tawh tih sawiin, heng zinga 25% vel chauh thunun theih a la ni.