Sri Lanka party-te Parliament ṭhiah an khing let

Sri Lanka President Maithripala Sirisena-an Parliament ṭhiat a, nakkum January 5-a inthlan ṭhat neih tura a puan chu party liante chuan Supreme Court-ah an khing let.

President Sirisena hian kar hnih liamta khan Ranil Wickremesinghe chu prime minister aṭanga banin, a aiah Mahinda Rajpaksa a ruat. Hemi hnu, kar kalta Zirtawpni zan khan Parliament ṭhiatin, nakkum kumtira inthlan ṭhat neih tur a nih tur thu a puang leh a ni.

Party lian pathum, Wickre-mesinghe-a party United National Party (UNP), eptu party lian ber Tamil National Alliance (TNA) leh leftist People's Liberation Party, assembly-a majority nei pha chuan Supreme Court-ah President thutlukna siam hi khingin, a thiltih chu dan kalh a ni tih puang turin an ngen.

Court official chuan petition hi pawm a nih thu sawiin, hearing neih hun tur chu Chief Justice kutah a awm tih a sawi. Political party-te bakah civil society group leh mimal eng emaw zatin President thiltih dan khin letna hi an thehlut tih a sawi bawk.