Sri Lanka SC-in President thupek a dan sak Rajapakse-an fiahna paltlang zo lo

Sri Lanka Supreme Court chuan an ram President Maithripala Sirisena-an Parliament ṭhiat a, nakkum January thlaa inthlanpui neih tura thupek a tihchhuah chu Thawhlehni khan a stay sak.

Supreme Court-in President thupek a stay sak hnuah, nimin khan Sri Lanka Parliament inkhawm neih nghal a ni a, Prime Minister atana ruat thar Mahinda Rajapakse rin tawk lohna motion putluh chu pass nghal a ni a, fiahna hi a paltlang zo ta lo a ni.

President Sirisena-an October 26-a prime minister aṭanga Ranil Wickremesinghe ban a, a aiawh tura Mahinda Rajapaksa a ruat hnuah Parliament a titawp lailawk zui a, hei vang hian tualchhung politics pawh a buai chho hle. Ramdangte nawrna avangin November 14-ah Parliament inkhawm a ko a, mahse kar kalta Zirtawpni khan sawi lawk loin Parliament hi a ṭhiat a, nakkum January 5-a inthlanpui neih turin a puang zui a ni.

Political party liante chuan President thupek hi na takin an sawisel nghal a, Wickremesinghe thlawptute chuan Supreme Court-ah President thupek hi an khing zui a ni. Thawhlehni khan court chuan petition lutte hi ngaihtuahin, President thupek tihchhuah hi December 7 thleng atan a dansak a, hemi hnu hian court chuan thutluka a la siam dawn chauh a ni.

Court-a petition eng emaw zat thehluhah hian kum 2015-a ram danpui siamṭhatna pass tawhah, President hian Parliament titawp tur hian thuneihna a nei lo a ni, an ti. Hetihlai hian Sirisena thlawptu lam chuan Wickremesinghe kaihhruai ṭangrual sorkar hian a thutiamte a hlen zawh loh avangin inthlan neih ṭhat chu kawng ṭha ber niin an sawi ve thung.

Wickremesinghe chuan court thutlukna siam chu lawmawm a tih thu leh, ram danpui nena inmil a ni tiin, mahni duhdan anga ram danpui chu sawisak mai theih a ni lo, a ti bawk. PM a nihna aṭanga ban a nih chu a pawm loh thu leh, House-ah pawh majority a la neih reng thu a sawi. PM official residence, Temple Trees pawh a chhuahsan duh lo. Hetihlai hian Rajapaksa pawhin dan ang taka prime minister atana ruat a nih thu a sawi ve bawk.

Nimina Parliament inkhawmah Speaker Kary Jayasuriya chuan member 225 awmna Parliament-ah member tam zawk chuan Rajapaksa rin tawk lohna motion hi an thlawp niin a sawi. Rajapasak hian fiahna paltlang zo lo mah se Wickremesinghe hi PM a ni leh nghal thei dawn lo a, President Sirisena-an prime minister tur hi a ruat leh a la ngai dawn a ni.

Speaker Jayasuriya-an Rajapakse fiahna tur vote a lak tir hmain, kum 72 mi Rajapakse leh a fapa Nmal te chu House aṭangin an chhuak a, Rajapakse thlawptu MP te chuan vote lak tum hi tihbuai an tum a, mahse Speaker hian a kaltlangpui lui a ni. Speaker chuan Rajapakse thlawp lo lam an chak tih sawiin, Rajapakse kaihhruai sorkar chuan House-ah thlawptu a ngah tawk lo tih a sawi.