US-in Hezbollah hruaitu fapa firfiakah puang

US State Department chuan Lebanon helpawl, Hezbollah hruaitu Sayyed Hassan Nasrallah-a fapa, Jawad Nasrallah chu Israel leh West Bank beihnaa inhnamhnawiha puhin firfiakah a puang.

State Department black list-ah hian Hez-bollah nena inzawmna nei leh, Palestian ram aṭanga Israel beihna tura ruahmanna eng emaw zat siamtu, Al-Mujahidin Brigades (AMB) pawh telh a ni.

Hamas hruaitu Salih al-Aruri, Lebanon Hezbollah hruaitute Khalil Yusif Mahmoud Harb leh Haytham Ali Tabatabaei te chu awmna chin hrilh thei hnenah US dollar maktaduai 5 ṭheuh pek a tiam bawk. Department thuchhuah chuan Hamas leh Hezbollah te hian Iran hnen aṭangin ralthuam, training leh sum te an dawng ṭhin niin a tarlang bawk.