Vawiin aṭangin Rohingya Muslim-te hruai kir tum

Bangladesh leh Myanmar sorkar chuan inremna an lo siam tawh angin, vawiin aṭang hian Bangladesh-a Rohingya Muslim raltlante chu Myanmar ramah hruai kir ṭan an tum.

Hetihlai hian United Nations chuan Rohingya-te awmna, Myanmar-a Rakhine state dinhmun chu a la him tawk lo nia sawiin, raltlante hruai kir tumna hi la kalpui rih lo turin a ngen. Bangladesh-a refugee camp-a awm mekte pawhin Myanmar sorkarin an himna ngaihtuah sak a tiam hma chuan kir an duh lo tih an sawi bawk.

UN High Commissioner for Human Rights Michelle Bachelet chuan Cox's Bazawr-a Rohingya raltlante chuan an duhdan ang loa Myanmar rama hruai kir an ni tur hi duh loin, an hlauthawngin an chiai hle tih a sawi. Tihluihna hmanga raltlante hruai kir chu dan bawhchhiatna a ni, a ti.

Nikum August thla aṭanga Rakhine state-a Myanmar sipaite beihpui thlak avang hian Rohingya Muslim nuai sarih chuang chu Bangladesh ramah an tlanchhia a ni. A hmain Bangladesh chhimchhak lamah hian kum eng emaw zat chu Rohingya mi nuai thum dawn an lo awm sa tawh bawk a ni.