US-in Russian oil lakluh a khap
United States chuan Russia-in Ukraine a run avanga Russia hrekna siam belh zelin, Russia aṭanga oil a lakluh pawh a khap leh.
US president Joe Biden chuan Russian oil, gas leh coal lakluh khap a nih thu hi Thawhlehni khan a puang a, UK pawhin kumin kumtawpah Russia oil lakluh hi tihtawp hman a tum tih a sawi. European Commission pawhin kumin chhungin Russia aṭanga gas a lakluh hi hmun thuma ṭhena hmun hnihah tihtlem tumin ruahmanna a siam bawk a ni.
President Biden chuan Russian oil lakluh khap vanga America mipuiten hun eng emaw chen gas man sang an tawrh a ngaih phah dawn mah se, Russia president Vladimir Putin chu a duhthu ngeia indo a chawh chhuah avanga hremna turin Russia economy tlusawp tura siam a tum tih a sawi.
US hian ram dang aṭanga oil leh gas a lakluh zinga 3% chauh hi Russia aṭanga lakluh a ni a, lakluh a khap tak avangin hemi zat hnawhkhatna tur hi a lakluhna ram dang aṭangin a ngaihtuah dawn a ni. Hetih lai hian Europe-in energy a mamawh zinga 30% dawn hi Russia aṭanga a lak a ni thung.
Russian natural gas company, Gazprom chuan Ukraine kaltlanga gas a pekchhuah, ni khata cubic meter maktaduai 109.5 a thawnchhuah chu dan pangngai anga kalpui reng a la nih thu a sawi.
Russia-in khawthlang ram vau let
Khawthlang ram hrang hrangten Russia hrekna an siam hnuah, Russia chuan heng an hrekna chhan letna tur na tak hi a siam ve dawn tih a sawi.
Russia foreign ministry-a department for economic cooperation-a director, Dmitry Birichevsky chuan, "Russia chhan letna tur hi chak tur, nghawng nei thui tak leh an buaipui hle tur a ni dawn a ni," tiin a sawi. Russia hian US leh EU-ten Russia aṭanga crude oil lakluh an khap a nih chuan heng ramah hian oil man a sang chho nasa dawn hle tih a lo sawi lawk tawh bawk.
Ram hrang hrangten an hrek avangin Russia hian kum 1991-a Soviet Union a kehdarh hnuah economy lamah a dinhmun chhiat ber lai a tawng chho mek a ni