Ukraine-in naupang damdawi-in beiah Russia a puh

Ukraine chuan Mariupol khawpuia civil mi tang mekten khawpui an chhuahsan theihna tura inkahhai puan a nih laiin, Russia chuan he khawpuia naupang hospital chu bomb hmangin a bei niin a puh.

Hetih lai hian Russia chuan civil mite a bei tel lo tih sawiin, Nilaini pawh khan Mariupol leh khawpui dang a beih mekah civil mite an tlanchhuah theihna turin ralthuam an che lek lo tih a sawi thung. Mahse city council chuan hospital hi vawi khat aia tam beih a nih thu a sawi a ni.

"Russia sipaite chuan naupang damdawi-inah bomb eng emaw zat an thlak a, chhiatna nasa tak a thlen phah a ni," tiin online-a an post-ah an tarlang. Mahse he report hi a dik ngei em tih erawh finfiah theih a ni rih lo.

Ukraine foreign minister Dmytro Kuleba chuan Russia thlawpna hnuaia awm, Ukraine khawchhak leh Crimea inkara mi, kum 2014-a Russia-in Ukraine kut aṭanga an chhuhsak, port chhim lama inkahhai puan chu Russia-in a bawhchhiat thu a sawi ve bawk. "Russia hian Mariupol-ah mi 4,00,000 chuang an hreng mek a, chhawmdawlna leh chhanchhuah hna kalpui pawh an dangchat vek a ni. Inbeihna pawh an chhunzawm zel a, nausen 3,000 dawnin damdawi leh eitur an tlachham bawk a ni," tiin a twitter-ah a tarlang.

Official-te chuan Nilaini khan civil mi ṭhenkhatte chu Ukraine khawchhak lama Sumy leh chhim lama khua Enerhodar aṭangin hmun him lam an pan thu an sawi. Mahse Russia sipaite chuan Kyiv khaw dai, Bucha-ah civil mite phurchhuaktu bus 50 lai an lo dang niin an sawi. Heng motor rualte hi an tlanchhuah theihna turin inbiakna neih mek a ni, an ti.

Russia-in Ukraine a run hnuah, civil mi maktaduai 2 chuang chuan Ukraine ram an chhuahsan tawh a ni.