Ukraine ṭanpuinan IMF-in USD tld 1.4 a pawm

International Monetary Fund (IMF) chuan Nilainia an executive board ṭhukhawm chuan Ukraine-a nitin mamawh phuhrukna tur leh Russia sipaite'n an run avangin an ram economy lama harsatna an tawh mek tihziaawmna turin, USD tluklehdingawn 1.4 an pawm tih a sawi. IMF chuan Ukraine hruaitute chuan pawisa puk lailawk tura inremna an siam chu sutin, he sum pek tur hmang hian an ram chu anmahni kea ding thei tura economic programme lam duan an tum tih an sawi thu a tarlang.

"Russia sipaiten Ukraine an run avang hian eibar zawnna kawngah mipuite'n harsatna lian tak an tawh phah a ni. Sum lama ṭanpuina lian tham leh rang tak an mamawh a, indona a thlen chhunzawm zel a nih chuan dinhmun chhe zawkah an awm thei a ni," tiin IMF Managing Director Kristalina Georgieva chuan meeting an neih zawha thuchhuah a siamah a tarlang. He indona thleng vang hian ni 13 chhung lekin mi maktaduai hnih chuang chu hmun him lam pana an tlanchhiat a ngaih phah a, infrastructure pawimawh tak tak tihchhiat a ni bawk a ni, tiin IMF chuan a sawi.

IMF hnuaia Rapid Financing Instrument (RFI) sum pek tur zat hi IMF-a Ukraine chan ai 50% a tling pha a ni. RFI hian IMF member ramte hnenah full-fledged program ngai kher loin rang tak siin sum hi a pechhuak ṭhin a ni.