Thailand : Nawrh huaihawtute'n Police Hqrs bei

Thailand khawpui Bangkok-a zirlaite kaihhruainaa nawrh huai­hawtte chuan Nilaini zan khan Royal Thai Police headquarters beiin a bang chu rawngin an ziak rang a, tuiin an theh huh bawk.

Police headquarters beih a nih lai hian police-te chu an station chhungah an awm nia sawi a ni. Buaina dang chhuak a awm lo niin media ṭhenkhatte chuan an tarlang. Zirlaite huaihawt hian an ram constitution siamṭhat phutin hun eng emaw chen nawrh huaihawt a ni tawh a, mahse thuneitute lamin an siamṭha duh lo a ni.

Hei bakah hian nawrh huaihawtte hian prime minister Prayuth Chan-ocha chu bang tura phutin, inthlan ṭhat buatsaih an phut bawk a ni. 

Parliament-in an ram danpui siam­ṭhat phutna a hnawl avangin nawrh hi huaihawt leh a ni a, pungkhawmte chuan Parliament kawt thlenga kawng zawh an tum a ni. Mahse police-ten lo dangin, tui leh mittui tlakna hlo hmangin an hnawtdarh a, pungkhawm zinga mi 40 velin hliam an tuar. 

Lungawi loa nawrh huaihawt, pro-democracy te hian an rama lal hnuaia rorelna chu an duh tawh lo a, lal hnena thuneihna pek pawh tihnep an duh a ni. Thailand lese-majeste law-ah chuan an ram lal laka zahpah lo taka chetna emaw sawisel zawnga thu sawi leh ziak emaw a thiang lo a, he dan bawhchhia chu kum 15 thleng lungin tan tir theih an ni. He dan hian mimalin zalen taka a duh a sawi theihna chu a dipdal a ni tiin lungawi lote chuan he dan hi an duh loh chhan an sawifiah. 

Nawrh huaihawtte hian sorkar langtlang leh mipui thlan roreltute (democratic) an duh a ni. 

Thailand prime minister Prayuth Chan-ocha chuan nimin khan a ṭul chuan dan zawng zawng chu nawrh huaihawtte dona atan hman a ni ang tia sawiin a vau. 

PM chuan nawrh hauihawtte avangin an ram dinhmun ṭhat lam a pan thei lo nia sawiin, tharum thawhna nasa zawk pawh a thlen mai  hlauhthawnawmin a awm a ni, a ti. Hei hi  a thleng a nih chuan an ram leh an lal chhungkaw thlengin a tichhe thei dawn niin a sawi. Hei vang hian sorkar chuan dan kalha chete lakah do letin nasa zawkin hma a la dawn a, a ṭul a nih chuan law leh article zawng zawng pawh hman a ni ang, a ti. 

Nawrh huaihawtnaa tel zinga mi 84 vel chu manin thubuai siamsak an lo ni tawh a ni.