US VP in Rohingya te chunga thil thleng dem

US Vice President Mike Pence chuan Nilaini-a Myanmar ram hruaitu Aung San Suu Kyi-i nena an inkawmnaah, Myanmar-a Rohingya Muslim-te chunga thil thleng chu a dem thu a sawi. An buaina chinfelna tura Myanmar sorkarin hma a lak dan leh, hmasawnna awmte a hriat chak thu a sawi bawk.

Singapore-a ASEAN Summit neih karlakah Mike Pence leh Suu Kyi-i te hian Nilaini khan meeting an nei a ni. Pence chuan Myanmar sorkarin Rohignya raltlana anmahni duhthu ngeia an kir leh theihna tura hma a lak tum dante a hriat duh thu a sawi a, hei bakah hian Myanmar sorkarin Reuter journalist pahnih a man chuan America mi tam takte rilru a ti na hle tih a sawilang bawk a ni.

Malaysia Prime Minister Mahathir Mohamed chuan Suu Kyi chu na takin a lo sawisel tawh bawk a, political prisoner a lo ni tawh a, hei vang hian mipuite tawrhna pawh hrethiam tura beisei a ni, a ti. Rohingya mite chunga an chet dan chu insawifel theih a ni lo, a ti bawk.