UN palaiin Israel sorkar sawisel
Middle East-a UN palai, Nickolay Mladenov chuan Israel sorkarin Palestinian ram a luah, East Jerusalem-a Juda-te chenna tur in sak belh leh a tum chu a sawisel.
Mladenov chuan Israel sorkar thil tum chuan Palestinian state dinna tura hmalakna kawngah harsatna a siam belhchhah dawn a, hei bakah hian a ram luaha in sak a tum chu international law bawhchhiatna a ni, a ti.
Israel sorkar hmalakna hian US President-elect Joe Biden kaihhruai sorkar thar ding tur pawh a tihlungawi loh rin a ni. Joe Biden hi Israel-in a ram luaha Juda-te chenna tur in a sak thlawp lotu a ni a, Israel leh Palestinian state hran dinna tur, two-state solution chungchanga inbiakna neih pawh thar thawh leh duhtu a ni.
Pathianni khan Israel Land Authority chuan an website-ah East Jerusalem-a Givat Hamatos-ah Juda chenna tur in 1,200 chuang sak tharna tur atan tender a tichhuak a ni. Two-state solution a awm theihna atana hma la tu, NGO Peace Now thupuangtu, Brian Reeves chuan contractor-te chuan tender hi an chhang ṭan tawh a, nakkum January thlaa US President thar atana Biden lakluh a nih hmain an tifel hman dawn a ni, a ti. Tender changtu tihfel a nih hnuah in sak hna hi an ṭan nghal mai thei dawn tih a sawi bawk.
Palestinian Authority leh European Union foreign policy hotu pawhin Israel thiltih hi an sawisel tawh bawk a ni.
Ram tam takin Palestinian ram a luaha Israel-in Juda-te chenna in a sak ṭhin chu an sawisel a, hetih lai hian US President Donald Trump erawh chuan Israel hi a thlawp tlat thung. Trump-a term chhung hian Israel chuan a ram luaha in sak tharna tur tam tak a pawm hman a, heng zingah hian Palestinian nena an ram an inchuh zualna hmunte pawh a tel.
West Bank-ah hian Juda mi nuai nga vel an khawsa mek a, East Jerusalem-ah nuai 2.2 vel an awm tawh bawk. Israel-in daidanna leh checkpoint eng emaw a siam avangin West Bank aṭanga Jerusalem kalpawhna tam zawk chu dan a ni tawh.
Israel hian East Jerusalem-a sensitive area, E1-ah in sak tumin hma a la mek bawk nia sawi a ni. Givat Hamatos-a a sak bawk chuan, West Bank aṭanga East Jerusalem pawhna hmunte a ping vek dawn nia sawi a ni.