UAE-in Pakistan leh ram dang 11 visa titawp lailawk

United Arab Emirates (UAE) chuan Pakistan ram tlawh tura visa thar pekchhuah chu a titawp lailawk a, hei bakah hian ram 11 visa-te pawh a titawp lailawk bawk. Mahse hei hian visa lo pek chhuah tawhte erawh a huam tel lo ang. 

Pakistan foreign office thupuangtu, Zahid Hafeez Chaudhri chuan visa tihtawp lailawk a nih chhan hi UAE thuneituten Pakistan rama Covid-19 hri leng thawh hnihna a thlen an hlauhthawn vang niin a sawi. 

Visa tihtawp hian eng chin nge a huam erawh sawichian a la ni lo. UAE hian visa hi category hrang hrang a nei a, business, tourist, transit leh student visa te a awm a ni. 

Pakistan bakah UAE-in visa a titawp lailawk ram dang zingah hian Turkey, Iran, Yemen, Syria, Iraq, Somalia, Libya, Kenya leh Afghanistan pawh an tel. 

June thla khan Pakistan-ah hri kai an pun chak avangin UAE airline Emirates chuan passenger service a lo titawp lailawk tawh bawk. Pakistan-a hri kai tawh zawng zawng hi mi 3,63,380 a ni a, heng zinga mi 7,230 chu he hri vang hian an thi tawh a ni. Hri kai mek hi 30,262 an la awm. Tun hnaiah khawpui lian, Kawrchi, Lahore, Islamabad, Faisalabad leh Hyderabad-ahte hri kai an pung chak hle a, prime minister Imran Khan pawhin an ram mipuite chu lungrual taka hri darh tur venna kawnga thawk ho turin a lo ngen tawh a ni.