Kum 2030-ah petrol leh diesel car zawrh khap dawn

United Kingdom prime minister Boris Johnson chuan kum 2030-ah an rama petrol leh diesel car-te chu hralh chhuah khap tum a nih thu a sawi.

He hmalakna hi pound vaibelchhe 12 hu green agenda zinga mi a ni. Hmalakna thar hnuaiah hian chenna in, kawtthler leh motor kawngahte electric vehicle charging point, pound vbc 1.3 hu siamna tur pawh telh a ni. 

UK sorkar chuan an ramah sik leh sa inthlak (climate change) thunun a nih theih nan leh an ram chu kum 2050-a carbon tlemna (carbon-neutral) a nih theih nana hmalakna tur, UK Green Industrial Revolution tih a duang a, hetah hian hmalakna tur point 10 pawimawh tak tak a awm a ni. 

UK Green Industrial Revolution point 10 plan te sawilangin, Johnson chuan zero or ultro-low emission vehicle leite hnena grant pekna tur ruahman a nih thu te, pound maktaduai 500 dawn chu eletric vehicle battery siam leh tihchangtlunna atan hman a nih tur thu te a sawi. Point 10 a tarlan zingah hian cycling leh kea kal chu mipuite an uar zawkna tura chawilar leh inzirtir te, tui aṭanga hydrogen power hman ṭangkai tum a nih dante a sawi. Kum 2025-ah chuan "Hydrogen Village" siam hman an tum thute a sawi a ni.