Khmer Rouge hruaitu hlui pahnih thiam loh chantir

Cambodia rama kum 1975 -1979 chhunga Khmer Rouge rorel laia mi tam tak suatna thubuaiah Khmer Rogue hruaitu pahnih, kum 92 mi Nuon Chea leh kum 87 mi Khieu Samphan te chu thiam loh chantir an ni. Nuon Chea hi Khmer Rouge hotu lu ber, Pol Pol-a deupty rinawm tak ṭhin a ni.

Khmer Rouge hruaitu pahnihte hi thuneihna an chan laia Cham Muslim leh Vietnanemse hnam mi tam tak tihhlumnaa mawhphurtuah puhin, an thubuai hi UN thlawp tribunal-ah ngaihtuah a ni. An pahnih hian an mihringpuite laka pawikhawihna lian tak thlenah puhin dam chhung tang turin hrem an lo ni tawh bawk.

Kum 1975-79 chhunga Cambodia-a Khmer Rouge-in ro an rel chung khan mi maktaduai hnih an thi a ni. An zinga tam tak chu eitur mumal neih loh vang te, hnathawka chhawr rim nasat vang tea thi an ni a, hnam hmelma tia puha tihhlum tam tak an awm bawk a ni.

Khmer Rouge hi Pol Pot tia hriat lar, a hming tak Saloth Sar-a kaihhruai Maoist movement a ni a, a dintute hi France mithiam tak takte an ni. He movement hian Cambodia ram chu mahnia intodelh, loneitute duhthusam ramah siam a tum a, khawpui te tiruakin mi tam tak chu thingtlang lamah hna thawh luihtir an ni. Hnathawka chhawr mi tam tak chu ei tur neih loh vangin an thi a, ṭhenkhat chu hna an thawh nasat luat avangin an thi bawk.

Kum li chhung Khmer Rouge rorelna rawng tak hnuaia awmin, thuneitute chuan sorkar hmelma nia sawiin mi tam tak an nghisaksak bakah an tihlum a, heng te hi mithiam te, hnam tenau zawk leh sorkar official hluite an ni hlawm a, anmahni bakah an chhungte thlengin kut an tuar a ni. An rorel chhunga an chetdan rawng tak avang hian Khmer Rouge hi kum zabi 20-na chhunga roreltu rawng ber zingah chhiar tel an ni.