Kum 30 hnuah Iraq-Saudi Arabia ramri hawng

Iraq leh Saudi Arabia ram chuan kum 30 hnuah a vawi khatna atan an ramri, Arar border crossing chu Nilaini khan an hawng leh ta. 

Arar border crossing hawng tur hian Iraq interior minister leh Iraq-a Saudi ambassador-te chu Baghdah aṭangin ramri-ah hian an kal a, ramri kaltlang hian mipuite an inkalpawh theih tawh dawn bakah, bungraw phur motor-te pawh an kal thei dawn a ni. 

Iraq hruaitu hlui, Saddam Husssein-a'n Kuwait a run hnu khan ram pahnihte inkar hi a chhe hle a, hei vang hian kum 1990 aṭang khan Arar border crossing hi khar a ni ta a ni. Kum 2003-a US kaihhruaina hnuaia Saddam Hussein paihthlak a nih hnuah pawh an inkar boruak hi a ṭha thei chuang lo a ni. Kum 2007 khan boruak hi ṭha chho ṭanin, Saudi Arabia foreign minister Adel al-Jubeir chu Baghdad-ah a zin a, a hnuah hetih laia Iraq prime mininster Haider al-Abadi pawhin Riyadh a tlawh zui ve leh bawk. 

Ram pahnihte hian an inkar siamṭha chho zelin, commercial flight pawh an thlawh tir tawh a, kum 2017 khan aṭang Arar border crossing hawn chungchang pawh an sawidun ṭan a ni. Mahse ramri hawn an tum hi hun eng emaw chen an tikhawtlai leh a, Nilaini khan an hawng thei ta a ni.