China-in Rohingya chungchangah Myanmar puih inhuam

Myanmar sorkarin tualchhung boruak ṭha venhimna tur leh, Rohingya buaina chungchang chingfel tura a hmalakna chu China chuan a thlawp tih China Prime Minister Le Keqiang chuan Myanmar hruaitu Aung San Suu Kyi-i a hrilh.

Le Keqiang leh Suu Kyi-i te hi Singapore-a Southeast Asian summit neih kar lakah an inkawm a, Le chuan China chuan Myanmar ram nena an inzawmna leh an inṭhianṭhatna chu a dah pawimawh hle tih a sawi.

Bangladesh rama tlanchhia, Rohingya raltlante Myanmar rama hruai kirna tura ram pahnihten hma an lakna leh inremna an siamte chu China chuan a thlawp tih sawiin, hemi kawngah hian a ṭul anga puih pawh an inhuam thu a sawi bawk.

Myanmar sipaiten nikum August thlaa Rakhine state-a beihpui an thlak avangin Rohingya mi nuai sarih chuang zet chu Bangladesh ramah an tlanchhia a, heng mite hi an awmna state-ah hruai kir an nih leh theihna turin Bangladesh leh Myanmar sorkar chuan inremna an siam tawh a, November thla laihawl

aṭangin hruai kir hna ṭan turin an ti a ni. Hetihlai hian United Nations chuan Rakhine state boruak chu a la ṭha tawk lo nia sawiin, raltlante hruai kir hna chu la kalpui rih lo turin a ngen.