NKorea-in 'high-tech weapon' thar enchhin

North Korea chuan 'high-tech' tactical weapon thar chu an ram hruaitu Kim Jong-un-a enpuina hnuaiah hlawhtling takin a enchhin.

State media, KCNA news agency chuan Academy of National Defence Science-in ralthuam a enchhin hi eng ang chi nge a ni tih a sawichiang lo a, mahse hun rei tak aṭanga an lo siam tawh tih erawh a sawilang thung.

Kumin June thlaa Kim leh US President Donald Trump-ten Singapore-a summit an neih ṭum khan Korean Peninsula chu nuclear ralthuam awm lohna hmuna siam an lo remti tawh a, mahse hemi atana ruahmanna siamte erawh puanzar a ni lo thung .

South Korea chuan NKorea ral-thuam enchhin thar chu eng chi nge a ni tih a zirchiang mek tih a sawi a, NKorea chuan ralthuam siam tihtawp emaw, a missile base khar emaw turin intiamkamna a nei lo niin ṭhenkhat chuan an sawi bawk.