Tokyo-ah Covid-19 hri kai tam ber ni thleng

Japan khawpui Tokyo-ah nimin khan Covid-19 hri kai hmuh chhuah thar mi 534 awmin, ni khata hri kai hmuh chhuah tam ber ni a thleng.  

Tokyo governor Yuriko Koike chuan hri dona kawngah sorkar chuan a theih anga ṭhain hmalakna a neih zel dawn thu sawiin, hri hi thunun vat a nih loh chuan nitina hri kai thar hi mi 1,000-ah an kai chhoh mai theih thu a sawi.

Nilaini khan Japan ramah Covid-19 hri kai thar  mi 2,201 an awm a, hei vang hian Japan chu hri laka inveng tura inralrin tawpkhawkna  hun a thleng a ni, tiin an ram prime minister Yoshihide Suga chuan a sawi. Hri lengin zual lam a pan avang hian PM Suga chuan mipuite chu pawn chhuahnaah hmai tuam ngei ngei turin a chah a, theihtawpa fimkhur vek turin a chah bawk.

Hri inkaichhawnna hi thleng chho zel mah se ram economy ti ṭhuanawp thei zawngin sorkar chuan hmalak tumna a neih loh thu Suga chuan a sawi a, emergency pawh puan ni mah se economy lama chhiatna thleng thei tura inkhuahkhirhna chu hman loh hram tum a nih thu Suga chuan a sawi bawk a ni.

Japan-ah hian Covid-19 hri kai tawh zawng zawng hi mi 1,20,815 an tling tawh a, heng zinga mi 1,05,697 chu enkawl dawm tawh niin, he hri thihpui tawh hi mi 1,913 an awm tawh a ni.