Russia sipaite'n Ukraine khawpui Kyiv hnaihchilh zel

Russia sipaite chuan Ukraine khawpui Kyiv an hnaihchilh zel a, khawpui hi hmarlam leh khawthlang lam aṭanga panin an hual beh thuai a hlauhthawnawm tawh hle tih Ukraine sipai hotu chuan a sawi.

Ukraine president Volodymyr Zelenskyy chuan mipuite'n him taka an ram an chhuahsan theihna kawng, humanitarian corridor siam chu Rusisa sipaiten an bei tel niin a puh. Ukraine ramah chemical weapon leh chhiatna rapthlak tak thlen theihna ralthuam siam a ni lo tih sawiin, President chuan an ram beihna atana Russia-in biological weapon a hmang a nih chuan hrekna lian zawk an cho chhuak ngei ang, a ti.

Russia hian a hmain US chu Ukraine rama biological weapon siam dan zirchianna neihna tura sum peah a lo puh tawh a ni.

Hetih lai hian US Congress chuan Ningani khan omnibus 2022 spending bill a pass a, hetah hian Ukraine ram chhawmdawlna leh sipaite puihna tur USD tluklehdingawn 14 dawn a tel.

EU ramten Russia ram a thlawp avanga Belarus ram hrekna na zawk siam an remtih hnuah, Japan ram pawhin an rama Balrussian bank pathumte thil neih chu khawih chet theih lohin a hrek sak zui ve leh bawk.

Russia defence ministry chuan nimin khan Russia thlawp, Ukraine aṭanga inlakhran duhtute chuan Mariupol hmar lama awm, Volnovakha khawpui chu an la tawh tih a sawi.

Ningania Ukraine leh Russia foreign minister-te inbiakna neih chu inremna siam theih loin an tawp. Hei hi Russia-in Ukraine a run hnuah ram pahnih hruaitute hmaichhana an inbiakna hmasa ber a ni. Inremna siam thei lo mah se, inbiakna neih leh erawh an remti.

Russia president Vladimir Putin-a'n February 24-a Ukraine laka indona a puan hnu khan naupang 71 aia tlem lo chu an thi tawh a, mi 100 chuangin hliam an tuar tawh tih Ukrainian parliament official chuan a tarlang.