China Premier Li Keqiang-a'n kuminah a chawlh tur thu a puang

China Premier Li Keqiang chuan nimin khan kum nga term vawi hnih a hman zawh hunah, kumin kumtawp lamah hian a chawlh tur thu a puang.

Kum 66 mi, Li hi rorellai Communist Party of China (CPC)-ah president Xi Jinping tih lohah chuan a hotu ber a ni. Li chhuah rual hian sorkar member ṭhenkhatte pawh an chawl dawn a, CPC Congress chuan term tharah hian level tinah hruaitu thar an nei dawn a ni.CPC convention inkaihhruaina in a tarlan danin, party hotute leh sorkar chuan kum nga term vawi hnih an hman zawhah an chawlh a ngai a ni.

Hetih lai hian kum 68 mi, President Xi hian CPC hruaitu bakah sipai hotu leh President nihna a chelh mek a, hruaitu hmasate ang lo takin thuneihna hi a chelh zui dawn a ni. Xi hi CPC dintu Mao Zedong ang bawka “core leader” nihna an pek tawh avangin, a dam chhungin he hna hi a chelh zui ring tawk pawh an tam tawh hle.

Li hian kum 1976, May thla khan CPC a zawm a, Peking University-a Law Department aṭanga graduate niin, he university veka Scool of Economics-ah in-service graduate programme a zo bawk a, Economics degree-ah doctorate degree hlan a ni. Tunah hian 19th CPC Central Committee Political Bureau-ah Standing Committee member, State Council Premier, Leading Party Members Group-ah Secretary a ni mek a ni.