China-ah kum 2 hnua Covid-19 kai hmuhchhuah tam ber ṭum thleng

China ram health authority chuan nimin khan Covid-19 hri kai thar mi 3,400 dawn an hmuhbelh thu sawiin, kum hnih hnua China-a hri darh nasat ber ṭum a thleng. Hri kai tamna hmunah inkharkhipna kalpui nghal a ni bawk.

Hri a darh leh avangin Shanghai-a school-te chu khar nghalin, hmarchhak lama khawpui eng emaw zatah pawh inkharkhip hi an kalpui bawk a, province 19 velin Omicron leh Delta variant hri leng an hmachhawn mek a ni.

Jilin khawpuiah partial lockdown kalpui mek a ni a, mipui ṭhahnem takte chu pawn chhuak thei loa hren beh mek an ni. Hetihlai hian, North Korea nena an inrina, mi nuai sarih bawr vel chenna Yanji khawpui pawh tuma tlawhpawh theih lohin kharkhip nghal vek a ni.

Kum 2019-a Covid-19 hri hmuhchhuahna, China chuan khuahkhirhna khauh tak 'zero-Covid' policy hmangin inkharkhipna rang takin an kalpui ṭhin a, hri kai hmuhchhuah an tam apiangin zin veivah khapna leh mass testing an kalpui ṭhin a ni. Mahse hri inkaichhawn awl tak, Omicron variant kai ṭhahnem tak zingah natna langchhuak lo an tam avangin he hmalakna hi a hma angin awmzia a nei mai thei ta lo a ni.

Jilin provincial health commission official Zhang Yan chuan Omicron variant hriatchian loh avangin hmun ṭhenkhata hri darh tur dan chahna tura hmalakna chu a ṭha tawk lo niin a sawi. Jilin mipuite hian mass testing vawi ruk an paltlang tawh a, nimin khan Omicron kai mi 500 chuang hmuhbelh an ni. An khaw ṭhenawm, mi maktaduai kua vel chenna Industry hmunpui, Changchun-ah pawh Zirtawpni khan inkharkhip kalpui a ni.

Jilin province-a Siping leh Dunhua khuate pawh karliamta Ningani leh Zirtawpni khan kharkhip an nih thu official thuchhuak chuan a puang. Jilin mayor leh Changchun health commission hotute chu hri leng danchah kawnga hna an thawh ṭhat tawk loh avangin Inrinni khan an hna aṭanga ban an ni bawk.