Russia-in military traning base bei

Russia sipaite chuan Ukraine an bei chhunzawm zel a, nimin zing lam khan Ukraine khawthlang lama military training base an bei a, Poland nena an inrina an thleng teuh tawh hle a ni.

Lviv hmarthlang lam km 30 vela hlaa awm, Yaroviv military range chu rocket pariat hmanga beih a nih thu regional administration chuan a tarlang. Thi leh hliam an awm leh awm loh tarlan a ni lo thung.

Kum 2015 aṭang khan, Ukraine sipai training pe tur leh international NATO drill nei turin US chuan Yaroviv military range, Yaroviv International Peacekeeping and Security Center tia sawi ṭhinah hian instructor a tir ṭhin a ni.

Inrinni liam ta khan Russia chuan Ukraine khawpuite chu bei chhunzawmin, Mariupol leh Kyiv chhuahsan tumte chu bomb hmangin a bei niin Ukraine lam chuan an sawi. Russia sipaiten an beihna avangin Mariupol-a mi 1,500 chuang an thi tawh tih mayor office chuan a tarlang.

Ukraine defence ministry chuan Kyiv hmarchhak lam km 20 vela awm, Peremoha khua aṭanga tlanchhuah tumte chu Russia sipaite chuan an kah avangin an tlanchhiat a ngai a,Russia beihna avang hian mi pasarih thiin an zingah naupang a tel niin a sawi. Russia chuan civil mite tlanchhuahna tur kawng buatsaih a nih thu a sawi a, mahse Ukraine lam hian a hmuna kal civil mite chu bei ṭhinah Russia hi a puh thung.