Israel-in inthlan ṭhat buatsaih ngai maithei

Israel cabinet-in Gaza Strip-a Hamas helpawlte nena inkahhai puan an remtih avanga lungawi loa Defence Minister aṭanga Avigdor Lieberman a ban hnu leh, a kaihhruai party Yisrael Beitenu-in ṭangrual sorkar an thlawpna an hnuhdawh avangin Israel sorkar dinhmun a derthawng a, a hun hmaa inthlan buatsaih a ngai maithei nia sawi a ni.

Prime Minister Benjamin Netanyahu leh ṭangrual pawl dangte inbiakna neihpui mah se, inremna an la siam thei lo. Nimin khan ṭangrual sorkara tel party hotute chuan inbiakna an nei leh a, an thutlukna siam dan azirin inthlan ṭhat neih a ngai dawn nge ngai dawn lo tih a hriat theih ang. Hetilai hian ṭangrual sorkara tel, Habayit Hayehudi party hotu Naftali Bennett chuan Defence minister atana ruat a nih loh chuan sorkar an thlawpna hnuhdawhah a vau ve mek bawk.

Lieberman leh a party, Yisrael Beiteinu ten an thlawpna an hnuhdawh hnu hian Netanyahu-a kaihhruai ṭangrual sorkar hian parliament, knesset-ah seat khat chiahin majority hi a nei pha tawh a ni. Habayit Hayehudi hi ṭangrual sorkara party lian pathumna a ni a, a chhuahsan ve leh chuan Netanyahu hian party tenaute chauh thlawptu a nei tawh dawn a, ṭangrual sorkar hi a ding zui thei dawn lo a ni.

Bennett hian inthlan ṭhat buatsaih a phut a, mahse hei hi Netanyahu chuan a duh lo thung.

Netanyahu kaihhruai right-wing sorkar hi kum 2015 March thla aṭanga ding a ni. Israel ram inthlan danah hian bial aiawhte siam an nih avangin party malin sorkarna an siam thei ngai lo. Sorkar lai term hi nakkum November-ah a tawp dawn chauh a ni.

Kar kalta chhung khan Palestinian firfiak pawl, Hamas-ten Gaza Strip aṭangin Israel chhim lam chu rocket hmangin ṭum eng emaw zat an kap a, hei hi Israel sipaite chuan chhang let nghalin Hamas ho hmun eng emaw zat an kahchhiat sak a ni. Ni thum chhung Palestinian leh Israel sipaite inkara buaina a chhuah hnuah, Egypt palaina hnuaiah Hamas leh Israel chuan inkahhai puan hi a remti a ni.

Avigdor leh Benett te chuan Israel cabinet-in inkahhai puan a remti hi na takin an sawisel a, firfiakte laka tlawmna angah an ngaih thu an sawi. Hei vang hian Avigdor hi minister anihna aṭangin a bang a, Bennett hian defence minister-ah dah phutin, dah a nih loh chuan sorkar a thlawpna hnuhdawhah a vau nghal bawk.