Maldives president thar lalut

Ibrahim Mohamed Solih chu kar kalta Inrinni khan Maldives President thar atan rinawmna thu tiamtira lakluh a ni.

President thar lakluh inkhawm hi Maldives khawpui, Male-a national football stadium-ah neih a ni a, Chief Justice Ahmed Abdulla Didi-an rinawmna thu a tiamtir a ni. He hunah hian ramdang palai eng emaw zat leh high ranking official-te an tel. Rinawmna thu tiamtir a nih hnu hian an ram hruaitu thar hi 21-gun salute pek a ni.

President thar Solih chuan thu sawiin, Maldives ram chu democracy kawng dikah zawhpui a tiam a, ramdangte nen inlaichinna ṭha leh chak zawk siam a tiam bawk. Maldives mipuite hnenah a thu tiamte chu hriatsak reng tura chahin, fundamental rights leh mipuite zalenna vawn him te, an ram aṭanga eirukna umbo tura a intiamnate chu a theihnghilh ngai dawn lo tih a sawi.

Solih chuan Maldives mipuite dikna chanvo humhalh sak a tiam a, khawsakna atana an mamawhte pawh man tlawm zawka an hmuh theihna ngaihtuah a tiam a, import tax lak ṭhin pawh tihhniam a tiam bawk.

President thar rual hian vice president atan Faisal Naseem pawh lakluh nghal a ni. Solih-a kaihhruai sorkar tharah hian cabinet member 19 an awm dawn a ni.