CAR refugee mission beihnaah mi 40 chuang thi

Central African Republic (CAR)-a raltlan 20,000 chuang awmna, Catholic mission shelter beihnaah mi 40 chuang an thi a, midang eng emaw zatin hliam an tuar.

Kar kalta Ningani khan Kristian helpawl, 'Anti-balaka' tihte chuan Alindao khuaah Muslim mite an that a, phuba laknan Catholic ho enkawl, raltlante awmna hmun hi beih a ni ve leh a ni. United Nations' peacekeeping mission in the CAR (MINUSCA) chuan Kristian biak-in hal a ni bawk tih sawiin, mi sang chuang an tlanchhia tih a sawi.

Alindao legislator Etienne Godenaha chuan raltlante awmna camp hi hal chhiatsak vek a ni a, ruang 42 an hmu tawh a, an la zawn belh mek tih a sawi. He camp-a awmte chu khawpui chhunga DP (internally displaced person) camp leh ramhnuaiah te an tlanchhia niin an sawi.