President Trump-an California a tlawh

US President Donald Trump chuan kar kalta Inrinni khan California state tlawhin, ram kangin chhiatna a thlen dan te a enfiah.

California state hmar-lama ram kang nasa tak, Camp Fire vang hian mi 76 in nunna an chan tawh a ni. Chin hriat lohin mi 1,200 chuang an awm mek bawk a, official-te chuan an la pun chhoh an rin thu an sawi bawk.

Ram kang tuar nasa ber, Paradise khua tlawhin Trump chuan he khuaa chhiatna thleng chu pawi a tiin hmuh a hrehawm hle a ni tih a sawi a, a hmaa a lo sawi tawh ang bawkin ram kanna chhan pakhat chu ramngaw enkawl ṭhat loh vang a ni tih a sawi leh bawk.

President Trump chuan, ramngaw enkawlna mumal taka kalpui a ngaih thu sawiin, hemi atan hian environmental group-te pawh an thawhpui dawn tih a sawi a, he chhiatna thleng aṭang hian mitinin thil awmdan an hriatthiam a, hetianga chhiatna nasa hi a thlen nawn tawh loh a beisei thu a sawi.

Camp Fire bakah Los Angeles bula ram kang, Woolsey Fire vangin mi pathumin nunna an chan tawh bawk.

Ram kang vanga meikhu nasa tak chhuak vangin California hmarlam boruak a chhe hle a, khawvela air quality chhiatna ber a tling a ni. Kangmei chhuak vanga tlanchhia te awmnaah khawṭhalo leh luak hri a leng a, mi tam tak an damlo bawk.

Tunkar chhung hian ruah tam tham tak a sur rin a ni a, hei hian ram kang pawh a tihziaawm rin a ni. Mahse ruahsur hian tlangramah leimin leh tuilian te a thlen a hlauhthawnawm hle thung.

Paradise khuaa kangmei chhuakin in tam tak a kanchhiatte enkualin, President Trump chuan chhiatna tawkte chhanchhuah leh ṭanpui hna thawhnaa law enforcement, politician leh team te hnathawh chu a fak. Harasatna tawk mekte chu enkawl leh chhawmdawl an ni dawn tih a sawi bawk.