Russia leh Ukraine-in inbiakna nei leh

Russia leh Ukraine ram chuan inremna zawngin nimin khan inbiakna an nei leh.

Ram pahnih aiawhte hian a hmaa inbiakna an neihah inremna la siam thei lo mah se, kar hnih chuang indona thleng tawh tihtawp a nih theihna tura hma an laknaah a hmasawn zawngin an kal niin an sawi.

Nimin khan video-conference hmangin inbiakna hi chhunzawm a nih thu Ukraine president Volodymyr Zelensky-a adviser Mykhailo Podolyak chuan a sawi. Podolyak hi negotiating team-ah a tel bawk. Hemi hma hian Russia president Vladimir Putin thupuangtu, Dmirty Peskov pawhin ram pahnihten inbiakna an neih tur thu hi a lo sawi ve tawh bawk.

Russia negotiating team-a senior member Leonid Slutsky chuan an ram ṭhenawm Belarus-a inbiakna an neih chungchang sawilangin, inbiaknaah hian hmasawnna rah ṭha tak an hmuh chhoh zel thu a sawi. "Kan vawi khat inbiakna leh tuna kan dinhmun kan tehkhin chuan hmasawnna duhawm tak kan hmu tawh a ni," tiin "Palaite chu ṭanhmun inang ah an awm theih ka beisei a, document pawh an sign fel theih ka ring a ni," a ti.

Putin-a'n Ukraine-a sipaite a tirh luh hnuah, Russia leh Ukraine aiawhte hi ṭum eng emaw zat an inbe tawh a, tunkar hian Turkey-ah ram pahnih foreign minister-ten meeting an nei dawn bawk a ni.

Podolyak chuan Russia chuan thupek a tihchhuah leh ngawt ṭhin chu titawpin, anmahni lam dinhmun pawh uluk takin an ngaihthlaksak ṭan tawh niin Pathianni khan a sawi. President Zelenskyy pawhin Russia chuan inbiakna an neihah a tihdan phung pawh a thlak chho tawh niin a sawi bawk.