Indonesia leh Philippines-ah lirnghing na tak thleng

Indonesia khawthlang lam leh Philippines-ah nimin zing khan lir na takin a nghing a, mahse thiltih chhiat lian tham erawh a nei lo nia sawi a ni.

Indonesia-a Sumatra thliarkar khawthlang lamah magnitude 6.7-a na leh, Phillipines-a Luzon thliarkar-ah magnitude 6.4-a nain lir hi a nghing tih United States Geological Survey (USGC) chuan a sawi. Ram pahniha official-te chuan lirnghing vang hian thi leh hliam an awm lo a, tsunami thleng a awm hriat a ni loh thu an sawi bawk.

Indonesia National Disaster Mitigation Agency (BNPB) chuan an ram lir nghing hi zing lam dar 4.06-a thleng a niin, a inṭanna hi Sumatra-a Priaman city khawthlang lam, km 167 vela hla, lei hnuai km 21 vela thuk a nih thu a sawi. Lirnghing natna hmun hi Sumatra hmarlam Nias leh Hibala thliarkarte an ni a, heng hmun hi mihring an bit loh bakah mi tam zawk hi thing ina khawsa an ni a, hei vang hian chhiatna pawh a thlen nasat loh phah nia ngaih a ni. Philippines-ah chung zing dar 5.05-ah lir hi a nghing a ni.

Indonesia leh Philippines hi Pacific "Ring of Fire" huam chhunga a awm avangin lirnghing hi a thleng fo a ni. Thla hmasa khan, Indonesia rama North Sumatra-ah magnitude 6.2-a na in a lir a ngihng a, mi ṭhahnem tak an thih bakah chenna in leh mosqu-te pawh a sawichhe bawk. Kum 2004 khan, lirnghing magnitude 9.1-a nain Sumatra thliarkar chu sawiin, tui lian rapthlak tak tsunami thlenin mi 2,20,000 chuangin an thih phah a, an zinga mi 1,70,000 te chu Indonesia mi an ni.