Sri Lanka President hoa all-party meeting neih a hlawhchham

Sri Lanka President Maithripala Sirisena hoa an ram politics buaina awm mek chinfel dan ngaihtuaha Pathianni-a all-party meeting chuan thutlukna mumal an siam thei lo.

President Sirisena-an October 26-a prime minister aṭanga Ranil Wickremesinghe ban a, a aiah president hlui Mahinda Rajapaksa a ruat avangin Sri Lanka politics hi a buai chho ṭan a ni. Sirisena hian Parliament term zawhna tura thla 20 dawn a la awm chungin a ṭhiat zui a, inthlan ṭhat neih tur thu a puang bawk. Mahse hi party liante chuan Supreme Court-ah an khing let nghal a, SC chuan President Sirisena-an Parliament a ṭhiah chu a hnawlsak leh a ni.

SC-in President thupek a hnawlsak avangin Parliament inkhawm neih a ni a, hetah hian PM atana a ruat Rajapaksa chuan fiahna a paltlang zo lo a ni. Mahse President chuan hei hi a pawm duh lo a, a thurawnte an zawm duh loh niin a sawi thung.

Pathianni khan an buainate chinfel dan ngaihtuahin President hian all-party meeting a ko a, mahse meeting hi a hlawhtling lo hle.

Wickremesinghe chuan President-in PM a nihna aṭanga a ban chu ram danpui kalh a ni tih sawiin, prime minister a la ni reng tih a sawi.